Mal wider es paar zile für die daheblibene…

Guete tag mal wider!
Isch ewigkeite här sit ig mi z letschte mal gmäldet ha ir Schwiz…tröi nachem motto “weme nüd vo ihm ghört de geits ihm guet” 😉 Sit mim letschte masse-mail id Schwiz isch es halbs jahr vergange, u i ha doch einiges underno sit denn. E grobi zämefassig gäbe wie ging mini föteli (Flickr föteli), u vor churzem hani ou dä blog ufgsetzt u gibe mir itz müeh dä einigermasse ufem loufende z halte – jedefalls sötte d iträg hüfiger erschine als ire 6-monet frequänz…
Aber vore agfange… im Dezämber bini für guet zwe wuche ir Schwiz gsi (bewisföteli) u ha einigi vo öich ändlech mal wider gägenüber gha (sorry evi, ha das föteli grad wider entdeckt bim düreluege…)!


Isch e stressigi zyt ohni würklechi pousene gsi, het aber total gfägt. Zrügg z Ouschtralie hani de vor allem eis festgstellt: der schön warme Ouschtralisch summer z Sydney isch es grücht! Letscht jahr hets gheisse es sig e usnahm dases so füecht sig – das jahr isch no dütlech schlimmer gsi, u ersch am tag nachem offizielle summerändi isch plötzlech z schöne wätter wider fürecho. Der räge het ou zuegschlage woni im Januar uf Melbourne bi gfloge. Der Marc u d Mari hei denn ou grad bim Ueli u bir Gabi logiert, u mir si az Australian Open gange. Go bier trinke. Der ursprünglech plan wär gsi go tennis luege, aber dä samschtig im Januar isch eine vo de ganz wenige täg ir gschicht vom Australian open gsi wo ke einzige match isch gspielt worde uf de ussplätz. Tja. Derfür heimer vorem grosse fernseh usserhalb vom stadion mitem Roger mitglitte bi sim müehvolle sieg gäge Tipsarovic…ha iz no zitterigi händ!
Zwüschedüre hani ou mal wider chli gschaffet, mitti Februar bini de fürnes längs wuchenändi richtig Tasmanie (föteli…). Dert hani mi mit mine touchfründe vor Melburne University drü täg iz chalte wasser gstürzt. Es het mängisch chli überwindig brucht bi dene rägnerische u eher wilde bedingige, aber all die chline u grössere grottene i de klippe si d bemüehige allemal wärt gsi.
Der räscht vom erschte halbjahr 2008 isch ohni grosseregnis abgloffe, aber das heisst natürlech nid dases mir plötzlech längwilig wär worde… zum bispiel si der Ueli u d Gabi si im März Sydney cho bsueche – z raclette womer ir Swiss Cottage z Katoomba hei gässe het de derzue gfüehrt dass die beide u dank ihrer güetige mithilf ou ig stolzi bsitzer vomne racletteöfeli si. Der chäs uftribe isch e anderi sach gsi…wenn verfüegbar chunnter oft in chline schnitze a 100g, nid würklech bruchbar. Mi kolleg het ziemlech grossi ouge gmacht woni schliesslech imne lade ir nächi e halbe chäs über d theke in empfang gno ha…(föteli)

Süsch si mini weekends wider rächt touchlaschtig (wie dä blog sowit ou…), zmingscht ei morge isch jewils reserviert. I ha vor churzem ou no e nöii kamera gchouft, u die isch letscht wuchenändi ou grad no z erschte mal under wasser gsi. D kamera chunnt aber ou über wasser oft zum zug. Isch sogar scho so schlimm dass ig zwöimal am wuchenändi u dürd wuche am sächsi usem hus bi füre sunneufgang z fötele – i gloube nid das mini eltere das jemals für müglech ghalte hätte zu zyte woni de mal uf bi für zmittag ;-).
Vor paar monet si mir mal no sälber go bier braue z Wollongong (e stund outofahrt im süde). Nid zletscht wäg de höche prise für alkoholika i de läde isch das e superidee! Die chlini brauerei stellt sämtlechs brau-equipment zur verfüegig, u nach der wahl vo eim vo de fasch 200 bierrezäpt geits los. Füehlt sech fasch chli a wie im chemielabor (dert bini ou scho lang nüm gsi..), allerdings isch der massstab e andere als dass ig mir das bi gwöhnt gsi. Ei batch git 50 liter bier… Nachem zämemixe wird z roh-bier in e grosse behälter abgfüllt u während zwe wuche fermentiert. Z filtrierte produkt heimer när i fläsche abgfüllt (scho der spass bim abfülle isch dä usflug wärt…) u mues när innerhalb vo 6 monet konsumiert wärde – so lang hets das bier aber nid überläbt. Z resultat vo üsem „Golden Wheat“ brauversuech isch erschtklassig gsi, u mir si grad derbi e witere usflug i süde z plane… (föteli)
Sogar brueflech gits mal erfreulechs z brichte: nach 10 monet underbruch louft üse reakter ändlech wider, u mir chöi dert witermache womer vorem unerwartete shutdown ufghört hei. Immerhin. Die 10 monet hei allerdings es massivs finanziells loch hinderlah. Innerhalb vom nächschte monet wärde 80 stelle gstriche, das si sowit ig das im griff ha immerhin öpe 10% vor gsamtstellezahl. Üses institut wird witgehend verschont blibe (so wis usgseht), i hoffe das isch tatsächlech so. Mi vertrag louft no bis ändi Januar, mitere option uf es dritts jahr. Sowit ig das im momänt cha beurteile würdi gärn no es jahr länger z Ouschtralie blibe, wenn ou nid zwingend i däm job. I bi sit emne wili am umeluege, aber zmingscht z Sydney isch der markt für chemiker mit PhD ziemlech troche. Witerluege…
So, i dänke die wenigschte vo öich si bis hie cho mit läse, u i höre iz ändgültig mal wider uf. Der blog isch grundsätzlech uf Änglisch gschribe, aber ab u zue platziereni de wohl wider e zämefassig uf bärndütsch…

Advertisements

Tags: ,

2 Responses to “Mal wider es paar zile für die daheblibene…”

  1. Livia Ventresca Says:

    Super, die hie z’finge Bircher! chunnt mer grad rächt luschtig vor….9 Mönet lang ha i mir mini Fingerbeeri aus Blog Verfassere hie uf WordPress fasch wund tippet, hami aus Programmierere güebt und ha drbi z’einte oder angere mau aus Gschlagni frustriert usem Internetcafi müesse trottle. Ds Föteli ufelade isch würklech nid immer es Chinderspiu gsi…ömu nid, dass sie dert sie glandet, wo i se vorgseh ha gha!
    Umso schöner, hie uf dim Blog eifach e Kommentar z’platziere. Isch ächt schön, chani mi über dis Aussie- Läbe hin und wieder hie cho abdate.
    Dr trochnig Summer vo Sydney choufi definitiv auso o niemerem ab. Bi üs hets ja denn nume einisch gschüttet! Oaks!
    Bi itze oscho wieder 5 Wuche Dehei….Zit flügt nur so! Bi z’einte oder angere am Organisiere und scho wieder am Plän schmiede….d’Vorfreud isch haut eifach scho die Schönschti!
    Heb witerhin ganz e gueti Zit!
    take care
    Live

  2. Knischi Says:

    Sali du! Danke fürs Update! Saubere Sache mit dem Blog! Und tolle Bilder auf Flickr!
    Gruess und bis bald mal!
    Knischi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: